За Тристо

Во близина на градот Велес се наоѓа еден мал имот, со малечка винарија која наликува на здание од бајка, насликано од раката на архитектот врз благо извишување во селото Сујаклари и во непосредна близина на езерото „Младост“. Пред очи навираат сцени од весели дружби со пријателите и среќни лица. Дружби залеани со вкусно вино како придонес кон убавото расположение на дружината што се збрала. Вино направено со многу љубов, подарувано само на специјалните гости и блиски пријатели на сопственикот на оваа малечка винарија, како подарок од срце. Подарок од повардарскиот регион – родното место на најдоброто македонско вино.

Годината е 2005, а приказната е плод на сесрдната посветеност кон правењето вино како страст на творецот и сопственик на овој шармантен малечок дом на виното. Според зборовите на овој голем љубител на скапоцените гроздови капки во кои сета сончевина се впила, целта на создавањето на винаријата „Тристо“ е да се создаде место каде што ќе може да се ужива во виното и другарувањето среде идилична и живописна природа, како своевидна прослава на сите сетилни уживања – добрата голтка, вкусната храна и прекрасните пејсажни сцени кои ги спојуваат пријателите и семејството во една топла, бесконечна приказна; приказна која ќе трае со генерации...